الكثير من الجماهير المصرية يخطط ليوم 14 نوفمبر.. ماذا سيفعل وفين هيتفرج على الماتش ومع مين وبيخطط ح يعمل إيه لما نفوز إن شاء الله.. لكن هل فكرت في الناس اللي ح تمنعهم طبيعة عملهم من مشاهدة الماتش ومشاركة حسن شحاتة وأولاده ومعهم ملايين المصريين هذه اللحظات التي لن تنسى؟!
فهناك بعض أصحاب الأعمال الذين قد تمنعهم أعمالهم من متابعة مباراة مصر والجزائر.. يا ترى ح يتصرفوا إزاي؟
- إبراهيم علي
المهنة: بائع تذاكر بأحد محطات مترو الأنفاق
الرأي: أنا شايل هم اليوم ده قوي، لأن عندي وردية في نفس وقت الماتش، وطبعا مفيش تليفزيونات، الناس هتبقى بتتفرج على أبو تريكة وزيدان وأنا قاعد هنا أسمع الإذاعة الداخلية وتعليمات أنفلونزا الخنازير، المشكلة إن إرسال الراديو تحت الأرض وحش ومش عارف أعمل إيه، شكلي هاقعد أسأل الركاب أو أتصل بحد أساله على نتيجة الماتش.
- أحمد نعمان
المهنة: خدمة عملاء
الرأي: سأتغيب عن العمل في هذا اليوم حتى لو كان هذا الغياب سببا في رحيلي عن عملي، لأني لو اشتغلت متأكد أني هاعمل غلطات كتير لأن دماغي وتركيزي كله هيبقى في الماتش.
- محمد فاروق
المهنة: عامل بكافيتريا
الرأي: بالرغم من أني أعمل في مكان به أكثر من شاشة عرض إلا أني لا أستطيع مشاهدة المباراة باستمتاع كما أريد، فأنا أعرف النتيجة والأهداف فقط إنما المشاهدة بتبقى في الإعادة لأني بكون مشغول مع طلبات الزباين.
- أحمد السيد
المهنة: موظف
الرأي: أنا بسافر يوميا من المنوفية للقاهرة عشان الشغل، بروح على الساعة 8 أو 9 حسب مزاج القطار وهيئة السكة الحديد، اللي بتمناه أن القطارات تمشي في معادها يوم الماتش بس والجرار ميعطلش ومتحصلش حادثة، لأن ده حصل معايا يوم ماتش الأهلي وبرشلونة في احتفال المئوية وأتأخر القطار 3 ساعات وضاع الماتش مني!.
- مصطفى صبح
المهنة: طبيب
الرأي: أنا يومها هاكون عائد من أجازة في بلدتي بكفر الشيخ وسأعود مباشرة للعمل بالمستشفى، ويبدو أن الحل الوحيد سيكون متابعة المباراة في الإذاعة، لكن أدعو الله أن يكون المعلق جيدا حتى أستطيع أن أتحمل سماع المباراة!.
- حسين إبراهيم
بائع في محل حلويات
الرأي: صاحب المحل أمر بنقل التليفزيون من المحل ليضمن اهتمامنا بالعمل وسرعة تلبية طلبات الزبائن، حاولنا إقناعه بإحضار التليفزيون هذا اليوم فقط لكنه رفض، أنا عن نفسي اتفقت مع أحد أصدقائي أن يرسل لي من وقت للآخر رسائل موبايل لأعرف النتيجة وحال المنتخب.
- أحمد حسنين
المهنة: ملاحظ أمن بأحد محطات مترو الأنفاق
الرأي: أنا هموت وأشوف الماتش، بصراحة أنا ناوي أزوغ كل 10 دقايق أتفرج شوية وأرجع، أصله موضوع صعب بصراحة دي أول سنة ليا في الشغل وخايف غيابي يكون سبب فصلي بس أنا عاوز أطمن مصر بتعمل إيه.
.....
وأنت.. لو شغلك ح يمنعك من مشاهدة الماتش.. ح تعمل إيه؟!
اتنمى ان اوشاهد الماتش الثانى بس كنت عاوز اعرف المباراة الساعة كم لكى اعرف ان كنت ساغيب عن العمل ام لا وفى العموم سوف اغيب عن العمل باى حجة دى مصر ياجماعة …
وهينتهى بالتعادل السلبى
وستعاد المباراة فى الخرطوم
اما فى حالة التطاول او ان الجمهور احدث شغب او قذف اللعيبة فى الملعب بالطوب او العلب الفارغة فان المباراة ستلغى وتعاد فى الخرطوم