عشرينات

اشتبكنا جميعاً مع قرار تحديد سعة الانترنت خلال الأيام القليلة الماضية، لذا لن أطيل عليكم في مناقشة هذا الموضوع وإنما سأحكي لكم عن مفارقة واجهتني أثناء بحثي عن معلومات عن القرار الأخير للوزير .

استوقفني الإعلان وهو لشركة توزيع خدمات الانترنت، "..  تعلن شركة " فلانة " عن دخولها بمجال توزيع خدمات الإنترنت، وبسرعات ( تبدأ ) بـ 15 ميجا بايت/ث، بسعر 17.99 دولار أمريكي .. !!!! "، طبعا دار مخي ولف معتقداً أنها واحدة من تلك الشركات التي تعمل بمصر، ففركت عيني جيداً وركزت قليلاً لأعرف الحقيقة وهي أنها شركة تعمل بأوروبا..

أثار الإعلان مجموعة من التساؤلات التي لم تنته بمجرد إغلاقي للصفحة التي وجدتها صدفة بل بدأت للتوحديثي مع نفسي وحولها.. 17.99 دولار تقريباً 90 جنيه مصري، يعني أنا وأنت نحصل علي سرعة 512 كيلوبايت/ث وبتسعيــــن جنيه، والبني آدم الأوروبي بياخد سرعة 15 ميجابايت/ث وبرده بما يوازي التسعيـــن جنيه، فهل ده مثلاً علشان البني آدم الأوروبي مابيتكسرش وبتاع بلده، ولا يمكن الصين ضربت السوق.

لحد كدة وأنا مش متغاظ ولا متضايق ولا حاجة، الدنيا (peace)، لكن اللي يغيظك أن يومها طلع مسئول مصري في التلفزيون يقول أن الخطوة التي اتخذتها الوزارة لصالح الشباب وتشجيعهم على استخدام التكنولوجيا، والحد من استخدام الوصلات المضرة بالمستخدم قبل الشركة.الخ طيب بالذمة ده اسمه كلام ..

بصراحة دماغي خدتني لتفكير شيطاني هو أن الحكومة واخدة وصلة ( ليمتد) من أوروبا، وده آخرها في السرعات وعلشان تقدر تجيب إيجارها فالأسعار عالية على المستخدم ونرضى بقيلنا ونسكت وطبعا دار في بالي موضوع انقطاع الانترنت وفساد الاسلاك ده ان كله فيلم وان الحكومة بتتأخر في دفع الاستراك فيضطروا يقطعوا الخدمة..

ده موضوع الحكومة، لكن بقى الاعلان فكرني كمان بالشركات المصرية التي تقدم الخدمة الانترنتية وأسلوبها في استقطاب الناس، ووجدتها تذكرني بمثل مصري أصيــل وهو" أقرع ونزهي" .. لا هما بيقدمولنا خدمة عملاء سريعة وكويسة وقادرة علي حل مشكلة لواحد شغله وحياته ع الإنترنت، ولا سرعة إنترنت عدلة

وده كله كوم وقرار أنك تشترك كوم لن الموضوع مرتبط بعدة أطراف، حضرتك والشركة وقبلكما السنترال، ويلزمك من 15 إلى 30 يوم للحصول على الخدمة، وحوالي 50 جنيه ومبلغ محترم للسيد الذي سيقوم بتركيب السلك في بوكس التليفون عندك، ولازم تراعي حالتة الإجتماعية التي سيحكيها لك رغماً عنك منذ ولدته أمه وحتى الساعة السوداء التي رمته في طريق عيل سيس زيك كل اللي عايزة يستخدم انترنت  يعني عنده فراغ..


الموضوع مخلصش في دماغي لسه بيلف، وفي واحدة من دوراته تذكرت خبر اتجاه الحكومة لعمل بعض الموظفين من بيوتهم، ومش عارف هتعمل فيه أيه؟ ..


تعبت من التفكير واللف بيني وبين نفسي، ولكن الخلاصة أننا لانستحق هذا الاهتمام، وأرجوك لاتفكر في الهجرة إلى تلك الدولة الأوروبية التي تحصل فيها على سرعة 15 ميجا ب90 جنيه علشان البحر غدار وطبعا أنا قصدت عدم كتابة اسمها علشان الضحايا ..

ولكن إذا كانت الشركات ووزارة الإتصالات تري أن ذلك ما يجوز أن يطلق عليه سياسة الإستخدام العادل، فأنا أفضل أن أسميه سياسة الإستخدام البارد المفقود.